Batería militar de Punta das Viñas

A batería de Punta Viñas levantouse en 1739, con ampliacións posteriores en 1747, 1755 e 1762. Interviñeron nela, como na maioría de baterías da zona, os enxeñeiros militares Juan da Ferriere, Juan Vergel e Miguel  Hermosilla. 

Segue o deseño típico dunha batería costeira, como as anteriormente descritas, con algunhas especificidades. Na área sobre o mar, o muro esténdese nunha liña bastante recta que debuxa dous suaves saíntes. No extremo leste áchase a polvoreira, cunha nave de medio canón que a protexía do impacto das posibles bombas. 

Na cara de terra esténdese un muro con seteiras e ao final deste, na zona interior, construíronse algúns edificios: cuarto para o oficial e outro para o corpo de garda e un almacén para ferramenta. 

Ao oeste e tamén dentro da batería atópase o forno de reverbero para a bala vermella, co cal quentaban ao máximo as balas do canón antes de disparalas para que así causasen o maior dano posible, prendendo lume nas embarcacións. 

A localización actual desta batería non é a orixinal: atopábase a un quilómetro cara ao interior da ría, no espazo que agora ocupa o Porto Exterior de Prioriño Ferrol. 

Para a reconstrución da batería despois do seu traslado empregáronse capas de formigón sobre a cachotería de granito orixinal, o que lle outorga unha maior resistencia á estrutura.

Accede á guía de viaxe completa en versión galego en: drive.google.com