Aldea de A Seara (Lugo)

O glaciarismo é a modelaxe do relevo pola acción do xeo. Para que o xeo poida realizar modificacións no terreo en grandes extensións é preciso que dispoña dunha gran cantidade de masa. Sábese que ao longo da historia da Terra houbo períodos extremadamente fríos nos que se daba tal acumulación de grandes masas de xeo. No entanto, aínda que ao longo da historia xeolóxica do planeta existiron épocas máis frías ca outras, das máis antigas apenas quedan rexistros. É a partir dos últimos dous millóns de anos que somos capaces de reconstruír as condicións climáticas de lugares como o Courel, xa que as pegadas desas épocas glaciares aínda se recoñecen nos materiais da serra.

Ese período xeolóxico que inclúe os ciclos de xeo-desxeo máis recoñecibles, denomínase Cuaternario e perdura hoxe. O último desxeo tivo lugar arredor de 10000 anos atrás. Grazas a iso, en lugares como A Seara as grandes masas de xeo acumuladas nos cumios das montañas máis próximas descenderon, arrastrando todo o que atopaban ao seu paso, ata deterse en cotas baixas onde a temperatura derretía o xeo. A poucos metros desta aldea, nas beiras da estrada principal quedaron fosilizadas esas evidencias para desfrute de científicos, turistas e curiosos.

O glaciar da Seara partiría en altura entre os picos Mallón (1593 m) e Formigueiros (1639 m). O seu percorrido remataría augas abaixo da aldea da Seara a 950 metros de altitude, cunha lonxitude de case 5 quilómetros e un espesor máximo dexeo, estimado nuns 130 metros.

A medio quilómetro de chegar á aldea da Seara, sempre en dirección desde Quiroga, ao pé de estrada, temos no talude esquerdo un depósito glaciar de case 2 metros de altura. O que podemos observar nese punto son os efectos do paso dunha masa de xeo sobre as lousas, as rochas que conforman o terreo na zona.

Os fragmentos de lousa presentan estrías superficiais debidas ao rozamento da rocha contra o solo, ou contra outros fragmentos pétreos ao ser desprazadas baixo a acción do xeo val abaixo. Este tipo de xacementos glaciares denominados till son de interese porque nos indican a dirección de avance do glaciar.

A uns 50 metros de distancia en dirección a Quiroga temos un depósito glaciar diferente chamado morrena. As morrenas fórmanse pola acumulación de fragmentos de rochas e sedimentos de tamaño variable polo avance do xeo. O que temos é una masa non compactada de diferentes materiais dispostos erráticamente. Nalgún deles poden distinguirse tamén as estrías típicas dos tills.